Su fueddu pitzialla, chi currispundit a a s’italianu “minuzzaglia”, inditat incorraddeddus pitius de cosa (pani, linna, terra e atra cosa) opuru cosa pitichedda o de pagu contu. Su sufissu –alla est comunu a totu is fueddus chi chistionant de cositedda pitica (arrogalla, pitzialla, finialla, puspusalla) o de genti o cosa meda (mortalla), ma cun sinnificau unu pogheddu dispregiativu (pipialla, paperalla, burrumballa). In Casteddu est imperau puru po nai is incorraddeddus grassus de petza de procu (sa gerda). Su fueddu est unu derivau de ‘petza’ e s’etimologia ddu fait beni de su latinu *PETTIA (originariamenti “incueddu de petza”).
Unus cantu esèmpius bogaus de internet po biri su mangi de su fueddu funt:
Unu incorraddeddu de sa Bibbia tradùsia in sardu: Fradi, lassa chi ti ndi boghi sa pitzialla chi est in s’ogu tuu, e tui e totu non bis su cordau chi est in s’ogu tuu? (Lc, 6, 42)
Una arratzeta: Malloreddus de tomatas friscas, cun pitzialla de caboniscu, perdingianu fartziu, pisci fritu e binu bonu
Unu incorraddeddu de Alice in Wonderland, tradùsiu in sardu: Candu, totu a una borta, badaboooo!! Nc’est arruta a pitzus de unu muntoni de pitzialla de linna e folla sicada, e diaici at tentu acabu custa calada a bolidu.
Bibliografia:
M.L. Wagner, DES Dizionario Etimologico Sardo, Ilisso
Mario Puddu, Ditz LCS Ditzionàriu de sa Limba e de sa Cultura Sarda, Condaghes 2000
[box] “Fueddus e crosidadis” Parole e curiosità in lingua sarda[/box]
