Fatu-fatu unu fueddu in sardu: coloris!

Dònnia lìngua tenit una manera sua de donai su nòmini a is coloris, cunfroma a sa cultura chi depit trasmiti. Is lìnguas difatis faint sa manera de connosci su mundu e chini connoscit su linguisticamenti su mundu in d-una certa manera, at a arraxonai cun cussa idea. Po donai unu esèmpiu, is Inuit anca tenint centu maneras diferentis de nai “biancu”. Bivendi in mesu de sa nii, funt a cuntatu dònnia dii cun is sfumaduras suas (cun ludu, apena ghetada, fata a màrmini ecc.).

In sardu puru is cuncetus funt acapiaus a istrintu a sa cultura chi contat. Is coloris in sardu, cumenti a in atras lìnguas, si pretzint intra coloris cun nòminis “de basi” e coloris cun similitùdinis.

Is “coloris de basi”, funt cussus comunus a totu is lìnguas, cun d-unu nòmini astratu: arrùbiu, asulu, birdi, grogu, biancu, nieddu.

E is atrus? Po nai e ita colori funt su sardu pigat similitùdinis, acostendi su colori a una cosa. E duncas s’italianu rosa bessit a colori de arrosa (su frori), s’italianu arancione bessit a colori de aràngiu (sa fruta), s’italianu marrone bessit a colori de cafei o a colori de castàngia, s’italianu viola bessit a colori de lillu (o a colori de carèsima, ca in carèsima sa crèsia est cuncordada a cussu colori), su celeste italianu bessit a colori de celu o a colori de carru (is carrus fiant tintus aici), s’italianu grigio bessit a colori de cinisu.

Ndi abarrat unu feti, su colori prus bellu de su mundu: colori de cani fuendi. Sa tradutzioni? Beh, cussa dda depeis fai bosatrus!